Ek Hasrat-E-Aab Ho Gaya Hoon,

Ek Hasrat-E-Aab Ho Gaya Hoon,

Main Khud Hi Saraab Ho Gaya Hoon.



Likha Hoon Ik Ajnabi Zubaan Mein.

Honay Ko Kitaab Ho Gaya Hoon.



Ek Khuwaab Mein Ji Raha Tha Ab Tak.

So Khuwaab Hi Khuwaab Ho Gaya Hoon.



Tha Kitna Saja Huwa Ye Chehra.

Aur Kaisa Kharaab Ho Gaya Hoon.



Ginta Jo Raha Wo Mujh Ko Har Pal.

Be Hadd-O-Hisab Ho Gaya Hoon.



Gohar Tha Kabhi Dil-E-Sadaf Mein.

Ab Naqsh Bar Aab Ho Gaya Hoon.



Karta Tha Sawaal Zindagi Se.

Ab Apna Jawaab Ho Gaya Hoon.



Tu Beth Kinar-E-Ishq Main To.

Sohni Ka Chanab Ho Gaya Hoon.



Ab Toar Liya Chaman Say Rishta.

Jangal Ka Gulaab Ho Gaya Hoon.