Vo Thakaa Hua Meri Baahon Mein Zaraa So Gaya Thaa To Kya Hua,

Vo Thakaa Hua Meri Baahon Mein Zaraa So Gaya Thaa To Kya Hua,

Abhi Main Ne Dekha Hai Chaand Bhi Kisi Shaakh e Gul Pe Jhukaa Hua,



Jise Le Gai Hai Abhi Hawa Vo Varaq Thaa Dil Ki Kitaab Kaa,

Kahin Aansuon Se Mitaa Hua Kahin Aansuon Se Likhaa Hua,



Kai Meel Rait Ko Kaat Kar Koi Mauj Phool Khilaa Gai,

Koi Pairr Pyaas Se Mar Rahaa Hai Nadi Ke Paas Kharaa Hua,



Mujhe Haadson Ne Sajaa Sajaa Ke Boht Haseen Banaa Diyaa,

Mera Dil Bhi Jaise Dulhan Ka Haath Ho Mehandiyon Se Rachaa Hua,



Vahi Khatt Ke Jis Pe Jagah Jagah Do Mehakte Honton Ke Chaand The,

Kisi Bhoole Bisre Se Taaq Par Tah e Gard Hoga Dabaa Hua,



Vahi Shahar Hai Vahi Raaste Vahi Ghar Hai Aur Vahi Laan Bhi,

Magar Us Dareeche Se Poochhnaa Voh Darakht Anaar Ka Kya Hua,



Mere Saath Jugnu Hai Hamsafar Magar Is Shahar Ki Bisaat Kya,

Ye Charaagh Koi Charaagh Hai Na Jalaa Hua Na Bujha Hua...!