phir ankhon ne khwab sajaya hoga na
phir wehshat ne shor machaya hoga na
mere ansu phel gaye hain ankhon main
us ne mera soag manaya hoga na
tu ne bhi to shehr main basne ki khatir
kesa kesa dhong rachaya hoga na
main jo itne pas se tujh ko dekhon ga
tu bhi kitni door se aya hoga na
yeh jo adhi rat ko taray roye hain
phir badal ne chaand churaya hoga na
aaja meri neend kaheen se aa bhi ja
wo milne ko khwaab main aya hoga na
main to bas yeh soch k ghar se nikla hon
us ne muj ko aaj bulaya hoga na
jin perron k sookh gaye hain phal unko
us ne mera haal sunaya hoga na
0 Comments