Tujhe khoo kar bhi tujhay paaon jahan tak dekhun

Tujhe khoo kar bhi tujhay paaon jahan tak dekhun
Husn-e- yazdan se tujhe husn-e-butan tak dekhun

tune yun dekha hai jaisay kabhi dekha hi na tha
Mai tu dil mai teray qadmon ke neeshan tak dekhun

Sirf iss shoq se poochi hain hazaron baatein
Mai tera husn, teray husn-e-bayan tak dekhun

Meray veerana-e-jaan mai teri yaadon ke toofail
Phool khiltay nazar aatay hain, jahan tak dekhun

Waqt ne zehan mai dhudhla diye teray khad-o-khaal
Yun tu mai toottay taaron ka dhuwan tak dekhun

Dil gaya tha tu ye aankein bhi koi lai jata
Mai faqat aik hi tasveer kahan tak dekhun

Ik haqeqat sahi, firdos mai huroon ka wajood
Husn-e-insaan se nibat lun tu wahan tak dekhun