Teri jannat se hijrat kar rahe haiN

Teri jannat se hijrat kar rahe haiN

Farishte kya baghavat kar rahe haiN

Hum apne jurm ka iqraar karelien

Bahut din se yeh himmat kar rahe haiN

Woh khood haare hue hain zindagi se

Jo duniya par hukumat kar rahe haiN

ZamiiN bhiigi hui hai aansuoN se

YahaN baadal ibaadat kar rahe haiN

Fezaa meiN aayateiN mehki hui haiN

KahiN bach-che tilaawat kar rahe haiN

Humaari be-basi ki intehaa hai

K zaalim ki himaayat kar rahe haiN

ParindoN ke zameen-o-aasmaaN kya

Watan mein rah ke hijrat kar rahe haiN

Ghazal ki aag meiN palkoN ke saaye

Muhabbat ki hifaazat kar rahe haiN

MaiN apne bhaaiyoN se mukhtalif huN

Woh mausam ki shikaayat kar rahe haiN