Kya karon ranj gawaara, na khushi raas mujhe
Jeenay de gi na meri shiddat-e-ehsaas mujhe
Main kisi bazm k qaabil na raha tere baad
Hans parra hoon to huwa jurm ka ehsaas mujhe
Hum ne ik dosray ko pursa-e-furqat na diya
Meri khaatir thi tujhe, aur tera paas mujhe
Aik thehra huwa dariya hai meri aankhon mein
Jaane kis ghaatt pe maaray gi teri piyaas mujhe
Reza reza huwa jaata hai mera sang-e-wujood
Youn sada de na pas-e-perda-e-anfaas mujhe
Jaise pehloo-e-tarab mein koi nashter rakh de
Aaj tak yaad hai teri nigeh-e-yaas mujhe
Shaakh se berg-e-chakeedah ka taqaaza jaise
Kuch isi tarha abhi tak hai teri aas mujhe
Rooh k dasht mein ik hoo ka samaan hai, ay Shaaz
De gaya kon bhare shehr mein ben'baas mujhe
0 Comments