Shehr-e-Quaid ki kahaani maiN sunaoN kaise

Shehr-e-Quaid ki kahaani maiN sunaoN kaise

AsmaaN raNg huwa krta tha is paani ka

Khauf hota hi nahiN tha kahiN tuGhyaani ka

Koi zarra na tha sahil pe praishaani ka

Aankh maiN raNg na aata tha pshaimaani ka

Ab samuNdar ka lahu raNg dikhaoN kaise

Shehr-e-Quaid ki kahaani maiN sunaoN kaise

Roshni raqS kiya krti thi bazaroN maiN

Ik jhmaila sa lga rehta tha GulzaroN maiN

Amn ki pyar ki chain aur sakooN ki khbraiN

AaNkh khulte hi mila krti theeN akhbaroN maiN

Har gali koochay se ab laashaiN uThaoN kaise

Shehr-e-Quaid ki kahaani maiN sunaoN kaise

Ab tau wo haal hai keh lijay koi haal nahiN

Khoon ki surKhi se ab Khaali koi Daal nahiN

Ab koi rota hai maaN ko tau koi baba ko

Ab kahiN ujRi huwi kokh hai aur laal nahiN

Khoon roti huwi aaNkhoN ko bhulaoN kaise

Shehr-e-Quaid ki kahaani maiN sunaoN kaise

GoliyaaN chalti haiN aur laashaiN gira karti haiN

Ghar bhi jalte haiN masaajid bhi jala karti haiN

Laash par hone lagi ab tau syaasat aise

Khoon ki nehraiN sar-e-raah bahaa karti haiN

HukmraanoN kay nqaaboN ko uThaoN kaise

Shehr-e-Quaid ki kahaani maiN sunaoN kaise

Kaash ye aah-o-bukaa charKh-e-kohan tak pohNchay

Ye Sadaa mairi har ik ahl-e-watan tak pohNchay

Is se baRh kar bhi sitam ho ga koi kya Aashi

Khoon kay cheeNtay tau Quaid kay kafan tak pohNchay

Apne Quaid se nigaahoN ko milaoN kaise

Shehr-e-Quaid ki kahaani maiN sunaoN kaise