baat suno youn chup mat betho

baat suno youn chup mat betho
deevaron se lag kr rona
ankhen pathar ho janay se
kitna behtar hota hai na
kuch to bolo naa ab chanda
k main ankhen pathar hone
se pehle deevar se lag kr
dher sa teri yaad main ro lon
apne in khamosh labon ko
kholo naa aot yeh batla do
kya yeh chup chup deevaren bhi
aansu punchna jaan gayi hain
ab yeh dukh sukh banten gi na

hawa k lams dekha kar, gina na kar

hawa k lams dekha kar, gina na kar
meri tehreer k aansu chuna na kar

main teri ankh k tevar samajhta hon
faqat khamosh betha kar, kaha na kar

udasi k siva kya hai mere dil main
yeh ik bechain jungle hai, gila na kar

tera mil kar bichadna maar deta hai
mujhay tu khwaab main bhi ab mila na kar

mere jo dard hain younhi mehekne de
laga tu shoq se marham saha na kar

tujhay ab maatmi chehron se ulfat kiu?
tujhay main ne kaha bhi tha hansa na kar

teri awaz ghayel hi na ho jaye!
sadayen dasht main mujh ko diya na kar

meri awargi tujh ko na le doobay
tu mere sath betha kar chala na kar

muhabbat aazmati hai mujhay tum yaad atay ho

muhabbat aazmati hai mujhay tum yaad atay ho
judayi ab satati hai mujhay tum yaad atay ho

muhabbat k sunehray baagh main be chain c koyel
koi jab geet gaati hai mujhay tum yaad atay ho

azziyat ho k rahat ho koi kesi bhi manzil ho
tumhari yaad ati hai mujhay tum yaad atay ho

koi taskeen shuda chehra nahi bhata, nigah lekin
tumhain ro kar bulati hai, mujhay tum yaad atay ho

nahi jab tum yahan hotay, udasi zulm krta ha
muje itna rulati hai, mujhay tum yaad atay ho

mujhay lori sunati hain meri tanhaiyan shab bhar
udasi gungunati hai, mujhay tum yaad atay ho

kisi masoom hasrat per koi roti hui bachi
kabhi jab muskurati hai mujhay tum yaad atay ho

dekho main ne baat tumhari maani hai

in ankhon main hijr kaheen abaad kiya
din main qaid kiya shab main azaad kiya
sari umr tumharay naam laga daali
umr k ik ik lamhay ne barbaad kiya
ab sanson main door talak veerani hai
dekho main ne baat tumhari maani hai

tum ne kaha tha khush rehna, khush rehta hon
tum ne kaha tha hans dena, hans deta hon
aor koi gar mere baray poochay to
tum ne kaha tha chup rehna, chup rehta hon
phr bhi mujh per ik dukh ki sultani hai
dekho main ne baat tumhari maani hai

ab bhi hai mamool wohi din raat wohi
dukh bhi, dukh ka tool wohi, aor zaat wohi
ab bhi aksar tum per ghazlen kehta hon
ab bhi khud se krta hon ik baat wohi
neya hai chehra per tasveer purani hai
dekho main ne baat tumhari maani hai

dukh dardon ki mehfil khoob sajata hon
dukh seh seh kr ab main dard banata hon
deevaron k aansu behnay lagtay hain
aisay ankh main bhar kr paani laata hon
ab tanhayi bhi meri deevani hai
dekho main ne baat tumhari maani hai

tumhain dil ne pukara hai

tumhain dil ne pukara hai, mujhay tum yaad atay ho
kahan tujh bin guzara hai, mujhay tum yaad atay ho

tumharay bin ragon main zehr bharti hai udaasi bhi
khasara hi khasara hai, mujhay tum yaad atay ho

muhabbat ne lubada aorh rakha hai faqeeri ka
zamana kab gawara hai mujhay tum yaad atay ho

muhabbat main bhala asbaab kese vasvasay kese
mera sab kuch tumhara hai mujhay tum yaad atay ho

mujhay tanhaiyon se dar nahi lagta k ab mujh ko
tumhara hi sahara hai mujhay tum yaad atay ho

wo jitne aksa thay ankhon main saray bhool bhetha hon
tumhain dil main utara hai mujhay tum yaad atay ho 

muhabbat rooth jati hai

muhabbat rooth jati hai
yeh hai ik kaanch ki gudiya yeh gir kr toot jati hai

yeh ik lambi musafat se kabhi jab loat aye to
yeh ban kr aabla paon ka aksar phoot jati hai

tumhain main ne kaha bhi tha isay mat aazmana tum
k aisay aazmanay se muhabbat rooth jati hai

janay kya dhadakta hai yaar mere seenay main

janay kya dhadakta hai yaar mere seenay main
bhar gya hai kon itna pyaar mere seenay main

us ne cheen li akhir jeet meri aankhon se
reh gayi ha baqi ab haaar mere seenay main

iss qadar moassar hai ishq mera Mola se
khwakhishen jo deta hai maar mere saenay main

be panah muhabbat se main inhain bulata hon
phir bhi bas nahi paatay yaar mere seenay main

par kata takhayyal tha soch k parindon ka
iss liye hi aa bikhri daar mere seenay main

jab bhi koi baat chupana parti hai

jab bhi koi baat chupana parti hai
tab bhi sari baat sunana parti hai

tum bhi to bas shaam ka vada kartay ho
hum ko din main shaam sajana parti hai

badal chatt se roz hi rotha rehta hai
mujh ko khud barsaat churana parti hai

jab se wo shoqeen hua angaron ka
paani main bhi aag jalana parti hai

tanhai ko baat batata hu kuch aor
logon ko kuch aor batana parti hai

wo jo mujh ko yaad kabhi na ho payi
ab mujh ko wo baat bhulana parti hai

in gaalon ki pyaas bujhanay k khatir
ankhon se ik boond girana parti hai

pehle tujh ko khwaab main dekha krta hon
phir khud ko tabeer batana parti hai

bas gayi phir dil ki basti khwaab main

bas gayi phir dil ki basti khwaab main
dekh li jab aik hasti khwaab main

neend ki vaadi to jal thal ho gayi
ankh ab kitna barasti khwaab main

aik ko mailay se le aya tha main
aik guriya hai tarasti khwaab main

kitni mehngi par gayi ha jaag kr
thi yeh dunia kitni sasti khwaab main

ab bulandi per puhnch jaon ga main
dekh li hai main ne pasti khwaab main

waqt ki be dard nagan tuu kabhi
kash mujh ko sirf dasti khwaab main

ho gya main jaag kar kitna ghani
kis liye thi tung dasti khwaab main

Barish hoi to ghar k dariche se lag k

Barish hoi to ghar k dariche se lag k

Chop Chap sogawar tujhe sochte rahe