Dil Ke Uffaq Main Gumshuda Sitara Mil Jaye

Dil Ke Uffaq Main Gumshuda Sitara Mil Jaye,
Shab-e-Gham Main Koi Jeene Ka Sahara Mil Jaye,

Woh Jo Ik Shakhs Bohat Kam Muyassar Hai Aaj Kal Humko,
Arzoo Ye Hai Ke Kisi Roz Wo Saara Mil Jaye,

Ain Mumkin Hai Ke Taabir Bhi Ek Jesi Ho,
Tere Khuwabon Se Agar Khuwab Hamara Mil Jaye,

Usey Kehna Ke Mulaqat Adhoori Thi Wo,
Usey Kehna Ke Kabhi Aa Kar Dobara Mil Jaye,

Nafa-e-Zeest Ki Kab Humne Tamanna Ki Hai Mohsin,
Kya Ye Kam Hai Ke "MOHABBAT" Ka Khasara Mil Jaye...