Meri Wafa Ne Khilaaye Thay Jo Gulaab Saaray Jhulas Gaye Hain,

Meri Wafa Ne Khilaaye Thay Jo Gulaab Saaray Jhulas Gaye Hain,

Tumhaari Aankhoon Main Jis Qadar Thay Wo Khuwaab Saaray Jhulas Gaye Hain,



Meri Zameen Ko Kisi Naye Haadsay Ka Hai Intizaar Shaayad,

Gunaah Phailnay Lagay Hain Ajar-O-Sawaab Saaray Jhulas Gaye Hain,



Jo Tum Gaye To Meri Nazar Pe Haqeeqaton K Utray,

Ye Soochta Hoon K Kiya Karoon Ga Saraab Saaray Jhulas Gaye Hain,



Ye Moajza Sirf Aik Shab Ki Musafatoon K Sabab Huwa Hai,

Tumharay Or Mery Darmiyaan K Hijaab Saaray Jhulas Gaye Hain,



Ussay Batana K Uss Ki Yaadoon K Saaray Safhay Jala Chuka Hoon,

Kitaab-E-Dil Main Raqam Thay Jitnay Wo Baab Saaray Jhulas Gaye Hain,



Nazar Uthaoon Main Jis Taraf Bhi Muheeb Saaye Hain Zulmaton K,

Ye Kiya K Meray Naseeb K Mahtaab Saaray Jhulas Gaye Hain,



Tumhaari Nazroon Ki Ye Tapish Hai K Meray Lafzoon Pe Aablay Hain,

Sawaal Saaray Jhulas Gaye Hain Jawaab Saaray Jhulas Gaye Hain,



Yeh Aag Khamoshiyon Ki Kaisi Tumhaari Aankhoon Main Tairti Hai,

Tumhaaray Hontoon Pe Darj Thay Jo Nisaab Saaray Jhulas Gaye Hain ..!!