Ambar bhi bhula daita hay TooTay huway Taaray

Aanchal se mera khoon utarta bhi to kaisay

Wo kar kay mujhay qatl mukarta bhi to kaisay

YaadoN ki hawaa aankh se takra kay jo guzri

Baadal ne barasna tha thahartaa bhi to kaisay

Jo waqt kay saath aur bhi ho jaata hay Gehra

Wo zakhm-e-nehaaN waqt se bharta bhi to kaisay

ShaakhoN maiN meri Ashk bahaaroN ne piroye

Phir aisi bahaaroN pe maiN marta bhi to kaisay

Ambar bhi bhula daita hay TooTay huway Taaray

MaiN kya hooN mujhay yaad wo karta bhi to kaisay

NaadaaN thay hameeN sar pe kafan baandh kay aaye

Fahmida tha wo jaaN se guzarta bhi to kaisay

Jo WARD rha fasl-e-khizaaN maiN bhi shagufta

wo baad-e-bahaari se bikharta bhi to kaisay