Ab Ye Sochoon To Bhanwar Zehn Me Parr Jatey Hain
Kaise Chehrey Hain Jo Miltey Hain Bicharr Jatey Hain
Kyun Tere Dard Ko Dein Tuhmat e Veerani e Dil
Zalzalon Me To Bharey Shehar Ujarr Jatey Hain
Mousam e Dard Me Ek Dil Ko Bachaoon Kaise
Taiz Aandhi Me To Khaimey Bhi Ukharr Jatey Hain
Soch Ka Aaena Dhundla Ho To Phir Waqt K Sath
Chaand Chehron K Khadd o Khaal Bigarr Jatey Hain
Shiddat e Gham Me Bhi Zinda Hoon To Hairat Kaisi
Kuch Diye Tund Hawaon Se Bhi Larr Jatey Hain
Wo Bhi Kya Log Hain MOHSIN Jo Wafa Ki Khaatir
Khud Taraasheeda Asoolon Pe Bhi Arr Jatey Hain
0 Comments