Main Tera Intezaar Karun Ya Nahi Karun

Main Tera Intezaar Karun Ya Nahi Karun

Ye Kaam Baar Baar Karun Ya Nahi Karun

Le Aai Hai Hayaat Mujhe Phir Se Tere Paas

Tujh Se Nigah Chaar Karun Ya Nahi Karun

Maah-e-Tamaam Ka Kaheen Chehra Utar Na Jaaye

Zikar-e-Jamaal-e-Yaar Karun Ya Nahi Karun

Dekha Hai Raat Main Ne Tumhen Dushmano Ke Saath

Aankhon Pe Aitbaar Karun Ya Nahi Karun

Aisa Na Ho Ke Aaye Teri Dosti Pe Harf

Main Zakhm-e-Dil Shumaar Karun Ya Nahi Karun

Chehra Bana Hua Hai Ghum-e-Dil Ka Aaina

Daaman Ko Taar Taar Karun Ya Nahi Karun

Kya De Ga Intezaar Mujhe Kuch Pta Nahi

Ab Aur Intezaar Karun Ya Nahi Karun

Kacha Ghara Bhi Aaj Nahi Mere Haath Mein

Darya Ko Aaj Paar Karun Ya Nahi Karun

Dushwariyan Buhat Hain NAAZ Raah-e-Ishq Mein
Ye Raah Ikhtiyaar Karun Ya Nahi Karun…