Apni Palkoon Pe Jami Gard Ka Hasil Maangay,

Apni Palkoon Pe Jami Gard Ka Hasil Maangay,

Wo Musaafir Hoon Jo Har Morr Pe Manzil Maangay.



Meri Wussa'at Ki Talab Ne Mujhe Mahdood Kiya,

Main Wo Darya Hoon Jo Maujoon Se Bhi Sahil Maangay.



Khuwahish-e-Wasl Ko So Rang K Mafhoom Diye,

Baat Aasaan Thi Magar Lafz To Mushkil Maangay.



Sach Ka Munkir Huwa Arzaani-e-Khoon Ka Mausam,

Khaak-e-Maqtal Se Gawaahi Mere Qatil Maangay.



Dil Ki Zidd Par Na Khafaa Ho Meray Aflaak-Nasheen,

Dil To Paani Se Bhi Aks-e-Mah-e-Kamil Maangay.



Saans Meri Thi Magar Us Se Talab Ki "Mohsin",

Jaisay Khairaat, Sakhi Se Koi Saail Maangay.