Har Kisi Ko Kab Bhala Youn Mustrad Karta Hoon Main

Har Kisi Ko Kab Bhala Youn Mustrad Karta Hoon Main?

Tu Hai Khush Qismat Agar Tujh Se Hasad Karta Hoon Main



Bughz Bhi Seene Mein Rakhta Hoon Amaanat Ki Tarah

Nafraten Karne Pe Aa Jaon To Had Karta Hoon Main



Koi Apne Aap Manwaane Wala Bhi To Ho

Maan'ne Mein Kab Kisi Ki Rad-o-Kad Karta Hoon Main



Kuch Shaoori Sateh Par, Kuch La-Shaoori Taur Par

Kaar-e-Fikar-o-Fun Mein Ab Sub Ki Madad Karta Hoon Main



Iss Liye Mujh Se Khafa Hain Ehal-e-Gulshan Aaj Kal

Rang Jhutlata Hoon, Khushbu Mustrad Karta Hoon Main



Meray Jazboo'n Se Bachaao, Naik Dil Logo Mujhe

Roz-o-Shab In Bad-Maashon Ki Madad Karta Hoon Main



Dosroon K Waastey Likha Huwa Lagta Hai Jhoot

Apni Sachai Ko Aksar Aap Rad Karta Hoon Main



Rang Par Aai Huwi Hai Ab Junoo'n Khaizi Meri

Roz-o-Shab Toheen-e-Arbaab-e-Khird Karta Hoon Main



Tooq Gardin Mein Pehnta Hoon Lahoo Ki Dhaar Ka

Khalq Ko Hairaan SaJiD Zad-Ba-Zad Karta Hoon Main