Aish-E-Umeed Hi Se Khatra Hai,
Dil Ko Ab Dil Dahi Se Khatra Hai,
Hai Kuch Aisa K Us ki Jalwat Me,
Hamein Apni Kami Se Khatra Hai.
Jis Ki Aghosh Ka Hoon Deewana.
Us Ki Aghosh Hi Se Khatra Hai,
Yaad Ki Dhoop Tu Hai Roz Ki Baat,
Han Mujhe Chandani Se Khatra Hai.
Hai Ajab Kuch Muamla Dar-Paish,
Aqal Ko Aaga'ahi Se Khatra Hai,
Sheher-E-Ghaddar Jaan Ley K Tujhe,
Aik Amroohi Se Khatra Hai.
Main Kahoon Kis Tarha Ye Baat Us Se,
Tujh Ko Janam Mujhi Se Khatra Hai,
Aaj Bhi Aye Kanaar-E-Baan Mujhe,
Teri Ik Sanwali Se Khatra Hai.
In Laboun Ka Lahoo Na Pee Jaon,
Apni Tishna Labi Se Khatra Hai,
Jaun! Hi Tu Hai Jaon Kay Darpay,
Meer Ko Meer Hi Se Khatra Hai,
Ab Nahi Baat Koi Khatray Ki,
In Sabhi Ko Sabhi Se Khatra Hai..
0 Comments