Teri aankhon mein wo kuch tha, k hum ny kooch ki thaani

Kisi ka gham agar jee ka na youn aazaar ho jaata

To phir kaar-e-sukhan karna, hamein dushwar ho jaata

Hami nay juzz tumhaaray, dil mein kuch khuwaahish nahi rakhi

Gullon ki aarzoo karte to ghar gulzaar ho jaata

Jo pehlay se na hum ahbaab ko apnay parakh letay

To phir ik aur qaaim misar ka bazaar ho jaata

Bachaaye aaeina khanaay, yahi kuch soch kar hum ny

Bachaatey sang se sar ko to nazr-e-daar ho jaata

Kami si aa gayi dil ki kasak mein ashk behnay se

Agar ye dard barrh jaata, junoon aasaar ho jaata

Teri aankhon mein wo kuch tha, k hum ny kooch ki thaani

Wagarna phir hamein lehja tera talwaar ho jaata